पोखरा भदौ ११/ साफ १७ वर्षमुनिको महिला च्याम्पियनशिपमा नेपाल बङ्गलादेशसँग फेरि पराजित भएको छ । यो हारसँगै नेपाल उपाधि जित्ने होडबाट बाहिरिएको छ ।
भूटानको थिम्पुमा आज भएको खेलमा नेपाललाई बङ्गलादेशले ४–१ गोलले हरायो । बङ्गलादेशकी सौरभी अकन्दा प्रितीले ह्याट्रिक र थुइनुए मार्माले १ गोल गरिन् । नेपालकी भूमिका बुढाथोकीले गोल गरिन् ।
प्रतियोगितामा नेपालको यो चौथो खेल हो । यसअघि भएको खेलमा नेपाल बङ्गलादेशसँग ३–० गोलले पराजित भएको थियो । यसअघि नेपाल पहिलो खेलमा भारतसँग ७–० गोलले पराजित हुँदा दोस्रो खेलमा भूटानलाई २–१ ले हराएको थियो ।प्रतियोगितामा नेपाल, भूटान, भारत र बङ्गलादेश सहभागी छन् ।
